Xush kelibsiz!

Gitara chalishga bag‘ishlangan ilk va hozircha yagona o‘zbekcha saytga xush kelibsiz! Sayt yordamida gitara chalishni noldan boshlashingiz mumkin. Bundan tashqari, sayt sahifalarida yetuk gitarachilar uchun ham qiziqarli va foydali ma’lumotlar berilgan. Sayt sahifalari bilan o‘zingizga qulay tartibda tanishib chiqishingiz mumkin.

Sayt haqida

Gitara chalishni o‘rganish hamda chalish mahoratini oshirish ishtiyoqida yurganlar uchun mo‘ljallangan ushbu saytni ko‘pchilikning iltimosi bilan 2016-yil yo‘lga qo‘ydim. Sayt ayni damda 25 dan oshiq o‘zbekcha ashulaning to‘liq tabulaturasi, 50 ta o‘zbekcha ashulani ijro etish bo‘yicha videodars, 50 dan oshiq akkord diagrammasi va o‘nlab foydali linkni o‘zida jamlagan. Sayt sahifalarida nota yozuvidan tortib, to chalish texnikasiga qadar mavzular atroflicha yoritilgan.

Ushbu saytni tayyorlashda shaxsiy tajribam, Internet saytlar, bir necha kitob va qo‘llanma, xususan, Nick Freethning Learn to Play the Guitar: A Step-by-Step Guide (2004), Jonathan Adamsning Getting into Fingerstyle Guitar (2011) hamda Colin McAllisterning Learning to Play Guitar: Chords, Scales, and Solos (2017) asarlariga tayandim. Musiqiy atamalarni o‘zbek tiliga tarjima qilishda esa Abdusamad Ilyosovning „Dutor o‘rganish kitobi“ (1966), Qobiljon Usmonovning „Boshlang‘ich rubob darsligi“ (1975) hamda Qadamboy Rahimovning „Musiqaning elementar nazariyasi“ (2007) kitoblaridan foydalandim.

Hamroh YouTube kanal

Gitara mening eng sevimli cholg‘u asboblarimdan biridir. Shuning uchun bo‘lsa kerak, 2012-yil YouTube kanalimga o‘zbekcha qo‘shiqlarni gitarada ijro etish ko‘rsatilgan videodarslarni yuklay boshladim. Mening YouTube kanalim gitara chalishga bag‘ishlangan ilk o‘zbek tilidagi kanaldir. Kanalimda o‘zbekcha qo‘shiqlarni ijro etish bo‘yicha videodarslarni, turli qo‘shiqlarning kaver versiyalarini hamda boshqa qiziqarli videolarni topasiz.